- 647 -

1438. Juni 20.

Der liegnitzer Hofrichter und die Mannen daselbst verkünden einen Rechtsspruch der Mannen zu Donin in Sachen der liegnitzer Rathmannen und Hannos Brauchatsch wegen der Stadthaide.

Ich Anthonius Gefuge hoferichter czu Legnicz vnd dy man, dy zum rechtin sitczen doselbist, Hannos Swencz, Heincze Landskron, Anthonius Falkenhain, Nickel von der Leipe, Hannos Keiser, Hannos Dresler vnd Hans Schober bekennen, das vor vns in gehegtem dinge in den teidingen czwisschen den ratmannen der stat Legnicz an eyme vnd Hannos Brauchatsch am andirn teile eyn orteil wart geholet zcu den mannen zu Donyn solichis lowtis: Hiruff spreche wir manne zu Donyn recht vnd wissen is nicht bessir, das man orteil nicht vorandern noch bessern sal, sonder sy sullen in iren worten blibeh als sy vor gerichte vnd gehegter bank in clagen geclagit vnd in antwort vorantwort werdin, sindemol, das dy ratmanne der stat Legnicz setczin, das Brauchatsch hette wolt briue inlegin, dy her in syner antwort vorswegen vnd nicht geteilet wurden weren vnd Brauchatsch dowedir setczit, das her briue ingelegit habe, dy em von rechte geteilet seynt, so sullen sulche sachen off richter vnd scheppin adir manne bekentnisse, dy dorobir im rechten gesessen haben, steen; bekenten dy, das sich Brauchatsch in der orsache off dy briue geteidinget hette, dy em auch irteilt weren, hyngen denne dy orsachen von beidin teylen noch in dem rechtin, also das Brauchatsch doran nicht fellig irkand, noch mit rechte nicht abegesagit weren, so mochte Brauchatsch dy irteilten briue, do dy sachen anhyngen, mete in das recht geen lassen, weide abir Brauchatsch ander briue inlegin vnd inbrengen, dy her in syner antwort vorswegin hette, vnd em nicht irteilet weren, hetten em denne die ratmanne das mit rechte geweret, so muste her en dorumme bussen vnd kegin gerichte wetten von rechtiswegin, das dese recht gerecht sint. Gebin zu Donyn am freitage noch Viti vndir Nickils von der Plawunitcz des houptmannes ingesigil, des wir manschafft mit em gebruchen. Gescheen am nestin dinstage vor Prisce. Noch gotis geburt virczehenhundirt iar im achvnddreysigsten iare.

O. d. St. L. No. 360. Beide Siegel, des Anthonius Gefug und der Mannen, stark verletzt.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866